《爽報》獲得部份短片, 揭露該黑店以懷疑違禁藥物灌狗的惡行。
其實《爽報》數月前已開始偵查該黑店, 曾在該寵物店任職的店員爆料, 目睹柯姓僱主無良銷售及虐狗行為,「我睇住佢打麻醉藥落去隻2個月大的貴婦狗身上」。也有苦主投訴, 買狗回家即病, 獸醫診斷時表示,「懷疑佢被人打咗懵仔針」,最終將幼犬安樂死。
本周一警方表示接獲愛協投訴, 懷疑太子大南街96A唐樓單位虐待動物, 經一輪搜證後, 破獲此虐狗基地。據知此單位屬通菜街一間寵物店的倉庫, 店東是姓柯兩兄弟, 業務主要由大哥「豪哥」營運。
網上扮有領養服務吸客
柯氏兄弟上年5月在太子基隆街開設寵物店, 並透過網上販賣寵物, 「佢哋先喺網上放啲可愛幼犬相吸客, 客人睇啱, 再約時間落舖睇」。行內人透露, 豪哥一直在廣東佛山大瀝一個大型貓狗市場入貨, 「細種狗每隻400至600蚊有交易, 仲有專人送到香港, 再以幾千蚊暴利賣出去」。
為增加生意, 他更巧立名目, 以領養名義𠱁客上門, 當市民走到店內, 就會改口說狗隻已被領養, 然後乘機話有其他選擇, 向客人推銷約3,000元的狗仔, 可是這些狗健康狀況成疑,「平時靠藥物吊住條命」。
由於此店騙客無數, 被騙者在網上瘋傳他們無良銷售手法, 上址無法再做下去, 故本年2月, 柯氏兄弟轉到通菜街另起爐灶, 並以幼稚園為主題, 每日播放《春田花花幼稚園》的主題曲, 希望建立溫情形象。
通菜街新舖開張初期生意不俗, 前員工Simon透露, 他在3月入職後數日, 已目睹虐待狗隻事件, 更用手機偷偷拍下恐怖實況。
短片中清楚可見寵物店內環境擠逼, 廿多隻小狗分別放在籠內或地上, 一堆狗籠也叠在一起, 現場尚有大量針筒, 及印有簡體字的藥物和注射液。片中可見有兩名女職員, 一人在梳毛, 另一人則逐一粗暴地捉起小狗, 然後用針筒強行灌藥, 小狗不斷掙扎, 場面慘不忍睹。
Simon指該舖給予顧客的單據並無店舖地址和固網電話, 舖面亦無任何商業登記, 他親眼見過豪哥在收舖關閘後, 向一隻2個月的貴婦犬施針,「我見過老闆幫狗仔打麻醉針, 隻狗震咗幾分鐘, 同事話呢啲係抽筋」。
另一苦主姜先生則花數千元買下一隻病狗。「3月頭經過間寵物店, 我買咗隻3,800蚊的貴婦狗, 一返去狗仔已經有鼻水, 我哋認為佢有病, 過兩日帶佢睇獸醫, 先知佢患咗重感冒同腸炎, 獸醫更懷疑隻狗被人打咗懵仔針（興奮劑）, 佢話醫番都手尾長, 建議讓狗仔安樂死」。姜事後到寵物店追討, 理論一輪, 最終對方要求他簽下保密協議書, 才肯退錢。
專家指該藥物用途不明
本報把Simon所拍相片給非牟利獸醫診所主理人麥志豪查看, 他指香港大部份動物藥也是澳洲入口, 眼見這些不明藥物令人很不安,「所有動物藥品必須由獸醫配方, 藥袋上要列明份量及用途, 有嚴密規管, 但片中呢啲藥根本冇標示, 連乜嘢用途都未明, 亦唔會如片中那樣整支藥出售。另外見到有麻醉藥, 呢樣冇可能在民間出現」。
記者其後帶同Simon提供的資料和短片到店內求證, 豪哥一概否認,「冇呢件事, 同埋我唔係老細, 我打工㗎咋, 我哋冇呢啲藥（大陸藥）, 打麻醉針嗰啲我哋冇, 我個後巷門長期打開, 乜嘢人都入得嚟（店舖）, 人哋有心整我, 乜嘢都做得出㗎啦」。
直至本周一, 警方收到愛護動物協會舉報, 終破獲豪哥在大南街的狗倉, 更發現單位內藏有200盒懷疑受法例管制的第一類毒藥, 包括抗生素等, 其後再到通菜街寵物店搜證。目前被捕三名疑犯暫時保釋候查，7月4日返警署報到。
【video】https://www.youtube.com/watch?v=8iP2y5WdUe4
沒有留言:
張貼留言